Jógakennarar

Ása Sóley

Ása Sóley hóf að iðka jóga árið  2009 og fór í sitt fyrsta jógakennaranám árið 2012. Stuttu eftir námið hætti hún í vinnunni og hóf að kenna jóga í fullu starfi.

Hún segir það án efa vera eina þá bestu ákvörðun sem hún hefur tekið. ,,Jóga hefur gefið mér svo margt bæði andlega og líkamlega og ég er endalaust þakklát fyrir að fá að deila jógaástriðunni minni með öðrum á hverjum degi” segir hún.

Ása Sóley er með kennararéttindi frá Yoga Shala Reykjavík og High Vige Yoga á Balí ásamt grunn og framhaldskennaranámi í Yoga Nidra frá Amrit Yoga Institude á Florida.

Ásta Þórarinsdóttir

Ásta hefur lokið jógakennaranámi hjá YogaWorks 200 RYT og bætti nýlega við sig helgarnámskeiði í Yin-jógakennaranámi.

,,Í endalausum tímaskorti leitaði ég að hreyfingu sem sameinaði styrktaræfingar, liðleika og slökun og þetta fann ég í jóga. Í fyrstu má segja að jógað hafi snúist um tímasparnað en svo smám saman með reglulegri ástundun fann ég jafnvægið og einhverja samstillingu hugar og líkama. Svo er jóga líka skemmtilegt”

Bríet Birgisdóttir

Briet er jógakennari og hefur lokið bæði 200 og 300 tíma námi frá YogaWorks og starfar einnig sem aðstoðarkennari í kennaranámi YogaWorks. Auk þess að hafa bætt við sig 85 stunda námi í meðgöngujóga hefur Bríet sótt fjöldan allan af námskeiðum og vinnustofum, meðal annars með þekktum jógakennurum eins og Maty Ezraty, Jenny Arthur, Dice Iida-Klein og Donna Farhi. Bríet er hjúkrunarfræðingur að mennt með meistaragráðu í lýðheilsufræðum. Auk þess að vera jógakennari hjá Heilsu og Spa starfar hún sem heilsuráðgjafi hjá Klíníkinni.

 Bríet hefur alltaf haft mikinn áhuga á allri almennri hreyfingu og heilbrigðu líferni og hefur haft sérstakan áhuga á lífshamingju og vellíðan. Hún fann sjálf að jóga var það sem hafði mest áhrif á hennar vellíðan, bæði andlega og líkamlega. 

,,Það mikilvægasta sem þú gerir er að gera það sem þér finnst skemmtilegt, ef þér finnst jóga skemmtilegt þá ertu dottin í lukkupottinn! Því jóga mun gefa þér styrk, liðleika og innri ró til að takast á við verkefni lífsins í gleði og sorg” segir Bríet.

Guðrún Bjarnadóttir

Guðrún er jógakennari og lauk  200 CYT  í klassísku hatha jóga og vinyasa flæði árið 2014.  Guðrún er menntaður sjúkraliði og snyrtisérfræðingur og rak sína eigin stofu til ársins 2014 þegar að stoðkerfisvandi gerði það að verkum að útilokað var að hún gæti haldið áfram sínu fyrra starfi.   Jóga kom eins og himnasending í líf hennar og brennur hún nú fyrir því að hjálpa öðru fólki að styrkja stoðkefið sitt og finna kraftinn og vellíðunina sem að jóga gefur tilbaka.  Guðrún var í fimleikum sem barn og unglingur og hefur starfað innan veggja íþróttarinnar alla tíð síðan en hún hefur menntað sig í þjálfun barna og unglinga allt frá grunnþjálfun upp í afreksþjálfun á því sviði.
 
Guðrún hefur lokið 60 klst kennaranámi í barna og unglingajóga frá Little Flower Yoga í New York ásamt því að hafa tekið þátt í vinnustofum frá hinum ýmsu erlendu kennurum t.d. Jon Kabat Zinn, Lucas Rockwood, Dylan Werner, Barkan og Wim Hof method hjá Primal Iceland.

Elín Jónsdóttir

Elín hefur lokið 200 tíma námi til jógakennararéttinda sem eru viðkennd af Yoga Alliance hjá Awakende Life School of Yoga í Costa Rica og bætti nýlega við sig 200 tíma kennaranámi YogaWorks. Þá hefur hún nýlega lokið 9 daga námskeiði með áherslu á Pranayama eða öndunaræfingar hjá Yogayama í Stokkhólmi auk fjölda annarra jóganámskeiða. Elín hefur stundað jóga með hléum í á þriðja áratug. Hún uppgötvaði fyrst hversu áhrifamikil jógaöndun getur verið eftir að hafa lært hana í meðgöngujóga. Með árunum hefur jóga orðið sú hreyfing sem varð æ oftar fyrir valinu vegna þess að þar sameinast styrkjandi og liðkandi hreyfingar í kerfi sem myndar flæði.

“Fyrir fólk í krefjandi störfum getur jóga haft mikla þýðingu sem hvíldarstaður, þar sem fólk hægir á, beinir athyglinni inn á við um stund. Þegar jóga er stundað reglulega getur það dýpkað líkamsvitund og sjálfsþekkingu okkar sem aftur hjálpar okkur að koma vel fram við okkur sjálf og aðra. Í hraðanum sem oft einkennir samskipti okkar getur jógaiðkun myndað örlítinn dempara sem gefur okkur tækifæri til að draga djúpt andann áður en við bregðumst við áreiti. Við hættum þá að sveiflast á milli áreitis og viðbragða og förum að hafa meiri stjórn á daglegu lífi og getum valið að lifa lífinu í ívið rólegri takti.”

Hildur Holgersdóttir

Hildur byrjaði að stunda jóga reglulega árið 2013 og hefur ekki hætt síðan. Hún lauk 200 klst jógakennaranámi frá YogaWorks í Boston sumarið 2017.

Í desember 2018 bætti hún við sig réttindum (85 klst) frá Sally Parkes í Englandi, til að kenna meðgöngu- og mömmujóga 
Hildur er einnig hjúkrunarfræðingur og starfar á meðgöngu- og sængurlegudeild Landspítala.